नाशिक : नाशिक जिल्ह्यातील सटाणा तालुक्यातील अल्पवयीन मुलीवरील लैंगिक अत्याचार प्रकरणात मालेगाव येथील विशेष पॉक्सो न्यायालयाने आरोपी सुनील रामदास जाधव याला दोषी ठरवत नैसर्गिक मृत्यूपर्यंत सश्रम जन्मठेपेची शिक्षा सुनावली आहे. न्यायालयाने पॉक्सो कायद्यासह विविध कलमांखाली ही कठोर शिक्षा दिली.
या प्रकरणात पीडित मुलीवर वारंवार लैंगिक अत्याचार झाल्याचा आरोप होता. त्यानंतर झालेल्या शवविच्छेदनात ती सात महिन्यांची गर्भवती असल्याचे समोर आले. पीडिता, आरोपी आणि गर्भाचे डीएनए नमुने तपासणीसाठी पाठविण्यात आले होते. फॉरेन्सिक अहवालात आरोपीच गर्भाचा जैविक पिता असल्याचे स्पष्ट झाल्याने हा पुरावा न्यायालयीन सुनावणीत अत्यंत महत्त्वाचा ठरला.
सरकारी पक्षाने सादर केलेले पुरावे आणि युक्तिवाद ग्राह्य धरत विशेष न्यायाधीश के. जी. पालदेवार यांनी आरोपीला दोषी ठरवून कठोर शिक्षा सुनावली.हे प्रकरण नोव्हेंबर २०१९ मधील असून, सातत्याने होत असलेल्या शारीरिक व मानसिक छळामुळे पीडितेचा मृत्यू झाला होता. वैद्यकीय अहवाल, डीएनए तपासणी आणि इतर पुराव्यांच्या आधारे न्यायालयाने आरोपीविरोधातील आरोप सिद्ध झाल्याचे नमूद करत कठोर शिक्षा सुनावली.
