ग्लासगो (स्कॉटलंड): कॉमनवेल्थ गेम्स 2026 मध्ये भारतीय खेळाडूंची दमदार कामगिरी कायम असून स्पर्धेच्या सहाव्या दिवशी भारताच्या खात्यात आणखी दोन रौप्यपदकांची भर पडली. अॅथलेटिक्समध्ये गुलवीर सिंग आणि वेटलिफ्टिंगमध्ये हरजिंदर कौर यांनी शानदार प्रदर्शन करत भारताला यश मिळवून दिले. यामुळे भारताची एकूण पदकसंख्या 12 वर पोहोचली असून पदकतालिकेत भारत नवव्या स्थानावर आहे.

हरजिंदर कौरची सर्वोत्तम कामगिरी

महिलांच्या 69 किलो वजनी गटातील वेटलिफ्टिंगमध्ये हरजिंदर कौरने कारकिर्दीतील सर्वोत्तम प्रदर्शन करत 227 किलो (101 किलो स्नॅच + 126 किलो क्लीन अँड जर्क) वजन उचलले आणि रौप्यपदकावर नाव कोरले. कॅनडाच्या शार्लेट सिमोन्यूने 236 किलो वजन उचलून सुवर्णपदक पटकावले, तर ऑस्ट्रेलियाच्या फीबे हेमनने कांस्यपदक जिंकले.

गुलवीर सिंगचा ऐतिहासिक पराक्रम

पुरुषांच्या 10,000 मीटर धावण्याच्या अंतिम शर्यतीत भारतीय धावपटू गुलवीर सिंगने शेवटच्या टप्प्यात अफलातून वेग दाखवत रौप्यपदक पटकावले. त्याने 27 मिनिटे 49.78 सेकंद वेळ नोंदवत दुसरे स्थान मिळवले. ऑस्ट्रेलियाच्या काय रॉबिन्सनने सुवर्णपदक जिंकले, तर गुलवीर केवळ 0.85 सेकंदांनी मागे राहिला. भारतीय सैन्यात नायब सुभेदार म्हणून कार्यरत असलेल्या गुलवीरच्या या कामगिरीची सर्वत्र प्रशंसा होत आहे.

भारताची पदकसंख्या डझनभर

सहाव्या दिवसाअखेर भारताच्या खात्यात 2 सुवर्ण, 7 रौप्य आणि 3 कांस्य अशी एकूण 12 पदके जमा झाली आहेत. पदकतालिकेत भारताने नववे स्थान गाठले असून ऑस्ट्रेलिया 35 सुवर्णांसह एकूण 80 पदकांसह अव्वल स्थानावर कायम आहे. भारतीय खेळाडूंच्या सातत्यपूर्ण कामगिरीमुळे आगामी स्पर्धांमध्ये भारताच्या पदकसंख्येत आणखी वाढ होण्याची अपेक्षा व्यक्त केली जात आहे.