ठाणे : अवघ्या २५ दिवसांच्या नवजात बालकाचे अपहरण करून त्याची विक्री केल्याचा धक्कादायक प्रकार अंबरनाथमध्ये उघडकीस आला आहे. या प्रकरणाचा तपास करताना पोलिसांनी चार महिलांना अटक केली असून, अपहरण झालेल्या बालकाची अवघ्या चार तासांत सुखरूप सुटका करण्यात यश मिळवले आहे. संबंधित बालकाला गुजरातला नेण्याची योजना असल्याची माहिती तपासातून समोर आल्याचे सांगण्यात येत आहे. या घटनेमुळे ठाणे जिल्ह्यात खळबळ उडाली असून, लहान मुलांच्या सुरक्षेचा प्रश्न पुन्हा ऐरणीवर आला आहे.

बाळ बेपत्ता झाल्याने पालकांची पोलिसांत धाव

अंबरनाथ परिसरात दोन दिवसांपूर्वी ही घटना घडल्याची माहिती समोर आली आहे. संतोष वाघे यांच्या अवघ्या २५ दिवसांच्या बाळाला एका महिलेने पळवून नेल्याचा आरोप आहे. बाळ अचानक गायब झाल्याने आई-वडिलांसह नातेवाईकांनी त्याचा शोध घेण्यास सुरुवात केली. मात्र, सर्वत्र शोध घेऊनही बाळाचा ठावठिकाणा लागला नाही. अखेर चिंताग्रस्त पालकांनी पोलिसांकडे धाव घेत तक्रार दाखल केली.

या तक्रारीनंतर पोलिसांनी प्रकरणाचे गांभीर्य लक्षात घेऊन तातडीने तपास सुरू केला. तांत्रिक माहितीच्या आधारे पोलिसांनी तपासाची दिशा निश्चित केली. या तपासात बाळाचे अपहरण केल्यानंतर त्याची दुसऱ्या महिलेला विक्री करण्यात आल्याची धक्कादायक बाब समोर आल्याचे सांगितले जात आहे.

चार तासांत तपासाला यश; रेल्वे स्थानकावरून बाळ ताब्यात

अपहरण झालेल्या बालकाचा शोध घेण्यासाठी पोलिसांनी उल्हासनगर ते अंबरनाथ या मार्गावर तपास सुरू केला. तांत्रिक तपासाच्या आधारे पोलिसांनी अंबरनाथ रेल्वे स्थानक परिसरात शोध घेतला. यावेळी एका महिलेकडे असलेले अपहरण झालेले बालक पोलिसांनी ताब्यात घेतले.

पोलिसांनी अवघ्या चार तासांत कारवाई करत चार महिला आरोपींना अटक केली. त्यानंतर बालकाला सुखरूप त्याच्या आई-वडिलांच्या स्वाधीन करण्यात आले. आपल्या बाळाची सुखरूप सुटका झाल्याने कुटुंबीयांना मोठा दिलासा मिळाला आहे. दरम्यान, या प्रकरणामागे आणखी कोणी सहभागी आहे का, याचा तपास पोलीस करत आहेत.

गुजरात कनेक्शन काय? पोलिसांकडून तपास सुरू

या घटनेतील आणखी एक गंभीर बाब म्हणजे अपहरण केलेल्या बालकाला गुजरातमध्ये नेण्याची तयारी असल्याची माहिती तपासात समोर आल्याचे सांगण्यात येत आहे. त्यामुळे अटक करण्यात आलेल्या महिलांचे गुजरातमधील कोणाशी संबंध आहेत का, तसेच बालकांच्या अपहरण आणि विक्रीचे मोठे रॅकेट कार्यरत आहे का, याचा शोध घेतला जात आहे.

अटक केलेल्या महिलांचा यापूर्वी अशा प्रकारच्या गुन्ह्यांमध्ये सहभाग होता का, याचीही पडताळणी केली जात आहे. पोलिसांच्या पुढील तपासातून या प्रकरणातील आणखी महत्त्वाचे धागेदोरे उघड होण्याची शक्यता आहे.या घटनेने नवजात बालकांच्या सुरक्षेचा मुद्दा पुन्हा चर्चेत आला आहे. लहान मुलांवर लक्ष ठेवणे, अनोळखी व्यक्तींपासून सावध राहणे आणि संशयास्पद हालचाली आढळल्यास त्वरित पोलिसांना कळवणे आवश्यक असल्याचे या घटनेतून अधोरेखित झाले आहे.