नवी दिल्ली : अग्निवीर योजनेअंतर्गत सैन्यदलात भरती झालेल्या तरुणांसाठी केंद्र सरकारकडून महत्त्वाचा निर्णय घेण्यात आल्याची माहिती समोर आली आहे. पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत अग्निवीरांच्या सेवेसंदर्भात मोठा निर्णय घेण्यात आल्याचे केंद्रीय मंत्री अश्विनी वैष्णव यांनी पत्रकार परिषदेत सांगितले.
या निर्णयानुसार, यापूर्वी अग्निवीर योजनेत चार वर्षांचा कार्यकाळ पूर्ण केल्यानंतर केवळ २५ टक्के जवानांना नियमित सैन्यसेवेत संधी मिळण्याची तरतूद होती. मात्र, आता ही संधी वाढवून ७५ टक्क्यांपर्यंत नेण्याचा निर्णय जाहीर करण्यात आला आहे. त्यासाठी संबंधित अग्निवीरांना चार वर्षांची सेवा पूर्ण झाल्यानंतर आणखी दोन वर्षांचा अतिरिक्त सेवाकाळ देण्यात येणार असल्याचे सांगण्यात आले आहे.
अतिरिक्त दोन वर्षांच्या सेवेनंतर मिळणार संधी
नव्या निर्णयानुसार, चार वर्षांचा मूळ कार्यकाळ पूर्ण करणाऱ्या अग्निवीरांपैकी संबंधित ७५ टक्के जवानांना आणखी दोन वर्षे सेवा करण्याची संधी उपलब्ध करून दिली जाणार आहे. हा अतिरिक्त कालावधी पूर्ण केल्यानंतर त्यांना सैन्यदलात नियमित सेवेसाठी पात्र होण्याची संधी मिळणार आहे. मात्र, यासाठी संबंधित जवानांची स्वेच्छा, आवश्यक पात्रता आणि निवड प्रक्रियेतील निकष पूर्ण करणे बंधनकारक असेल.
अग्निवीरांच्या सेवाकाळातील वेतनातही बदल?
दोन वर्षांच्या अतिरिक्त सेवाकाळात अग्निवीरांना मिळणाऱ्या वेतन आणि इतर सुविधांमध्येही बदल करण्याबाबत निर्णय घेण्यात येणार असल्याची माहिती देण्यात आली आहे. या निर्णयामुळे सैन्यदलात दीर्घकाळ सेवा करण्याची इच्छा असलेल्या तरुणांना अधिक संधी उपलब्ध होण्याची अपेक्षा व्यक्त केली जात आहे.
अग्निवीर योजनेत महत्त्वाचा बदल
अग्निवीर योजना सुरू झाल्यापासून देशभरातील विविध जिल्ह्यांमध्ये भरती प्रक्रिया राबवण्यात आली. या योजनेच्या माध्यमातून तरुणांना सैन्यदलात सेवा करण्याची संधी मिळाली. शारीरिक क्षमता, शिस्त, नेतृत्वगुण, तांत्रिक कौशल्य आणि आधुनिक लष्करी प्रशिक्षण यावर या योजनेत भर देण्यात आला आहे. तसेच महिलांनाही सैन्यदलातील विविध विभागांमध्ये संधी उपलब्ध करून देण्यात आली आहे.
केंद्र सरकारच्या या नव्या निर्णयामुळे अग्निवीरांच्या भवितव्याबाबत महत्त्वाचा बदल होण्याची शक्यता आहे. अतिरिक्त दोन वर्षांच्या सेवेमुळे अधिक तरुणांना नियमित सैन्यसेवेच्या निवड प्रक्रियेत सहभागी होण्याची संधी मिळणार असून, या निर्णयाकडे देशभरातील अग्निवीर आणि त्यांच्या कुटुंबीयांचे लक्ष लागले आहे.
